НОВИ САД – Покраїнска влада на вчерайшей схадзки принєсла Одлуку о чишлє школярох за упис до першей класи штреднїх школох на териториї АП Войводини у школским 2017/18. року, хтора виробена у сотруднїцтве зоз школскима управами Нови Сад, Зренянин и Зомбор, штреднїма школами, як и з локалнима самоуправами, пре прилагодзованє потребох одредзених штредкох за дзепоєднима фахами з уписну политику.
З Одлуку утвердзене число школярох котри ше можу уписац до першей класи по округох, општинох, школох, роботних подручох, образовних профилох, тирваню образованя и язикох на хторих наставна програма запровадзена. У наступним школским року до першей класи штреднєй школи ше годни уписац 19 114 порядни школяре.
На териториї АП Войводини роби 131 штредня школа – 25 ґимназиї (общи и специялизовани), 75 фахово школи, 11 мишани школи, 10 уметнїцки школи и 10 штреднї школи за школярох з почежкосцами у розвою. Число местох за школярох з почежкосцами у розвою не уходзи до цалосней квоти за упис порядних школярох до першей класи штреднїх школох.