ВУКОВАР (ГОРВАТСКА) – У орґанизациї Координациї рускей националней меншини Републики Горватскей (РГ), всоботу, 27. мая, у Городским музею Вуковар отримана Централна Шветочна Академия з нагоди Дня Руснацох у РГ.
Осме по шоре означованє Дня Руснацох у Горватскей почало з кладзеньом венцу коло Крижу на улїву Вуки до Дунаю, хтори положела делеґация Координациї Руснацох РГ и висланїца Вуковарско-сримскей жупаниї Ядранка Ґолубич.
Шветочна Академия у Городским музею почала з интонованьом гимни РГ и шветочней шпиванки Руснацох у Горватскей, хтори виведли Женска шпивацка ґрупа КУД „Яким Ґовля” з Миклошевцох и Хлопска шпивацка ґрупа КУД „Яким Гарди” з Петровцох. На гармоники их провадзел Звонко Еделински.
Шицких присутних на Шветочней академиї привитал предсидатель Координациї Руснацох РГ Борис Бучко, а окреме привитани висланїк предсидателя Влади Републики Горватскей, городоначалнїк Вуковару Иван Пенава, спомнута Ядранка Ґолубич и висланїк крижевского владики, вицевикар Славонско-сримского викарияту о. Владимир Седлак.
Медзи госцами на Шветочней академиї з нагоди Дня Руснацох РГ привитани и подпредсидателька Националного Совиту Руснацох Сербиї Наташа Еделински Миколка, член Совиту за национални меншини РГ Звонко Костелник, предсидателька Союзу Русинох РГ Дубравка Рашлянин, Представителька рускей националней меншини Осиєцко-бараньскей жупаниї Агнетка Балатинац и предсидателє радох рускей националней меншини Городу Вуковар Лела Дїтко и Општини Боґдановци Владимир Дудаш.
Програму провадзели и предсидателє културних и културно-уметнїцких дружтвох Руснацох у Горватскей, нашо грекокатолїцки священїки з Вуковару и Райового Села, як и представителє Городу Вуковар.
Културни и културно-уметнїцки дружтва з Миклошевцох, Осиєку, Петровцох, Винковцох и Вуковару на Академиї одшпивали вецей пригодни шпиванки, а писнї руских авторох рецитовали Любица Гаргай, Владимир Дудаш и Томислав Рац. Конферансу, хтору написала Агнета Бучко Папгаргаї, водзела Леся Мудри.
По Шветочней академиї друженє предлужене на коктелу у Городским музею.