ЖДИНЯ (ПОЛЬСКА) – У Ждинї, у южней Польскей, од 20. по 22. юлий, отримани 36. Фестивал лемковскей култури „Лемковска ватра” на хторим, спомедзи вецей як 1 500 учашнїкох, наступело и Културно-просвитне дружтво „Карпати” зоз Вербасу. Тото госцованє Вербащаном оможлївели Союз Руснацох Українцох Сербиї, Национални совит Руснацох и Општина Вербас.
Фестивал урядово отворел и шицких госцох привитал предсидатель Здруженя Лемкох зоз Горлицох пан Штефан Клапик, а Вербащанє – хор, оркестер и шпиваче, з тей нагоди наступели всоботу на пополадньовим концерту. Други наступ „Карпати“ мали внєдзелю пополадню на концерту „Бодай ше когут забановал, кед ме рано пребудзел…”.
На тогорочним, 36. Фестивалу лемковскей култури, отримани и числени вистави, округли столи, промоциї книжкох и други манифестациї, а пияток, 20. юлия, тот фестивал почал зоз дзецинским фестивалом „Ватрочка“. Пияток вечар отримани и вечарши концерт за младих под назву „Заграйце гудаци, на полни смик, а я вам заплацим – кед предам конїка…”. Концерт тирвал до ранших годзинох з оглядом же у кампу на фестивалу було вельо младих медзи хторима и дзешецеро Руснаци хтори сполнєли критериюми Роботного цела за младеж Националного совиту Руснацох.
Под час фестивалу, пияток и всоботу, отримана схадзка зашеданє СФЛО-а, шветовей орґанизациї Лемкох, Руснацох и Українцох зоз хтору предшедовала панї Ярослава Галик, а на хторей були присутни и активно участвовали у роботи представителє зоз України, Словацкей, Сербиї, Америки, Канади и домашнєй Польскей. На зашеданю нє були присутни лєм представителє зоз Горватскей. Найвецей ше бешедовало о проблемох хтори исную медзи представителями нашого народу у спомнутих жемох.
Всоботу зоз зашеданьом руководзел Боґдан Виславски, а понукнути ришеня як висц зоз терашнїх условийох и робиц лєпше и успишнєйше. На фестивалу направени и нови контакти медзи учашнїками зоз рижних жемох. Як резултат такей єдней догварки будзе и госцованє коцурского КУД „Жатва” на тогорочним фестивалу „Дзвони Лемковщини” хтори ше отрима наиходзацого викенду у месце Монастириско у Тернопольскей обласци у України.
