ЧАРДАК – Од 12. по 15. юлий на Делиблатскей писковини, на Чардаку, отримане духовне стретнуце – одпочивок „Марияполи хторе орґанизує Рух фоколарох. На нїм участвовали и велї Руснацох, окреме млади – коло 40 з Руского Керестура, Коцура, Нового Саду и Кули.
„Марияполи” то духовне стретнуце, алє и одпочивок, понеже є отримане у природним амбиєнту Делиблатскей писковини, у одпочивалїщу. Подобни стретнуца ше отримую по цалим швеце, а на нїм ше шицки учашнїки у тим Марийовим городу – Марияполию намагали жиц по християнски у шицких активносцох – и духовних, и рекреативних. Учашнїки були рижних ґенерацийох, вирох и народносцох, та и Стретнуце було у духу екуменизму. Кажди дзень була Служба Божа хтору єден дзень предводзел беоґрадски надвладика Станислав Хочевар, а раз була и православна Литурґия.
Заєднїцка тема за шицки возрости була Мария Богородица – як ю християнє можу нашлїдовац у каждодньовим живоце. Тема розпатрана през шицки днї у кратких рисох, а була подкрипена зоз шведоченями особох котри ше так намагаю жиц – фамелиї, священїки, млади. То порушує чловека же би и вон так жил. У тим духу була и казань надвладики Хочевара хтори учашнїком поручел – зоз своїм животом шпивайце о любови Божей и славце Його мено!
Млади, медзи хторима и Керестурци, ше окреме анґажовали коло пририхтованя духовно – рекреативних змистох: теми, музични точки, розвага, франтовлїви скечи… а єдна учашнїца виприповедала и свойо особне шведоченє.
Учашнїки були на вилєту у Смедереве, а кажди дзень могли послухац и викладаня на форумох зоз трох темох – о фамелиї на хторих бешедовал православни священїк хтори ма 9-еро дзеци, о Мариї – з аспекту рижних Церквох, а Соня Виславски, дипломовани психолоґ з Руского Керестура, пририхтала тему о депресиї и осаменосци. Млади мали окремну ґрупу на хторей було бешеди о сполносци, а дзеци мали свою програму зоз хторим ше шицким представели.
Як заєднїцке заключенє на дискусийох було же важне знац же зме нє сами и треба ше потримовац як заєднїца, понеже швет коло нас жиє иншак и чловек кед сам нє може витримац.
Остатнї дзень Михайло и Мария Римарово бешедовали о вельким шветовим стретнуцу за младих – Джен фесту хторе ше отримує кажди шейсц роки у рижних державох. Того року є отримани у Манили, на Филипинох. На нїм були и штверо представителє зоз Сербиї, а медзи нїма и Римарово з Нового Саду. Вони иншак путовали аж штири днї и такой з драги пришли на тото стретнуце за хторе пририхтали презентацию о Джен фесту.