ДЮРДЬОВ – Всоботу, 26. авґуста, млади з КУД „Тарас Шевченко” у своїх просторийох орґанизовали перши Квиз „Укаж цо (нє) знаш”.
Квиз мал вецей цалосци, а були облапени рижни поняца з рускей литератури, линґвистики, историї и общих поняцох зоз живота Руснацох. Же би питаня були добре пририхтани, орґанизатором помогли – мастер руского язика и литератури Ана Римар и мастер историї Саша Сабадош, котри бул и супервизор.
Змагали ше три екипи – з Нового Саду у котрей були Наташа Джуджар, Лара Петкович и Ивана Чордаш, з Руского Керестура участвовали Йован Живкович, Микола Барань и Борис Раґаї, а Дюрдьов представяли Кристина Хромиш, Лидия Вереш и Мирон Кухар.
Змагателє указали завидне знанє, та мали и приблїжно боди. Новосадянки завжали перше место (174 боди), друге место Дюрдьовчанє (168 боди), а треце место завжали Керестурци (155 боди). За перше место учашнїки достали по кнїжку НВУ „Руске слово” и шольку з лоґом Квиза, котра дзелєна и за друге и треце место.
После квизу друженє предлужене у Дружтве, а учашнїкох забавял домашнї млади „Джемс Бонд Бенд”.
