РУСКИ КЕРЕСТУР – Члени Здруженя паприґарох „Капсикум анум” з Руского Керестура вовторок, 2. мая отримали ище єдну схадзку о висини наднїци у паприґи, а тот други сход отримани на инициятиву бриґадирох котри приводза роботнїкох до валалу, так же на нєй присуствовали два бриґадирки з Вербасу и єдна з Керестура.
– На прешлей схадзки паприґарох догварена цена од 1 400 динари за 8 роботни годзини, лєбо 175 дин. на годзину швидко потвердзена и на тей догварки, а проблем бул коло висини трошкох за превоз и услугу бриґадира, цо нє може буц исте за менше число роботнїкох и за цали автобус – гварела предсидателька Здруженя паприґарох Душица Орос.
Дотераз єден бриґадир приводзел наднїчарох до вецей паприґарох и од каждого ше наплацовало єдну дуплу наднїцу за бриґадира, без огляду на число роботнїкох. Тераз догварене же єден бриґадир по тей основи може наплациц лєм єдну дуплу наднїцу, и тот пенєж ше будзе дзелїц на шицких ґаздох, спрам числа роботнїкох.
Цена превозу може буц розлична, зависно од места биваня роботнїкох, алє порадзене же зоз шицкима трошками цена за роботну годзину нє шме буц векша як 215 динари.
– До заєднїцкей догварки нє було лєгко дойсц и по тей догвареней цени маме понукнуца за роботнїкох. Наздавам ше же нашо члени буду почитовац догварку, бо шицки ґрупи роботнїкох оглашени з боку Здруженя прилапели таки условия – гварела Оросова.