РУСКИ КЕРЕСТУР/КАРАВУКОВО – Прешлого тижня, члени Здруженя паприґарох „Капсикум анум” зоз Руского Керестура нащивели Землєдїлску задруґу (ЗЗ) „Аґродунай” у Каравукове на поволанку директора Польопривредней фаховей служби у Зомборе Владимира Сабадоша, котри заступнїк и предсидатель Управного одбору спомнутей Задруґи. Вєдно зоз Сабадошом, паприґарох приял и директор Задруґи Стеван Станойкович.
ЗЗ „Аґродунай” тераз єдна з найуспишнєйших у заходнобачким округу, а пред осемнац роками була у предликвидациї, занїма ше зоз статкарством, овоцарством и продукцию нашеньских културох. У своїм составе ма центер за дорабянє польодїлских и заградкарских културох, та аж и поверхносци засадзени зоз тополями, по чим є єдна з ридких котра ше занїма з лєсарством на тих просторох.
Керестурски паприґаре мали нагоду видзиц дїялносц задруґи и їх биланс. Попри тим, нащивели и овоцнїк черешньох поверхносци 10 гектари на Боґоєве котри у составе Задруґи, а цала продукция ше рихта за вивоз до Русиї.
Сабадош зоз сотруднїками отримал и кратке викладанє о темох за цо ше интересовали Керестурци, найвецей бешедоване о рижних способох продукциї у польопривреди, а паприґаре ше окреме интересовали за покраїнски конкурси.