РУСКИ КЕРЕСТУР – Роботне цело за младеж Националного совиту рускей националней меншини на своєй 10. порядней схадзки вчера вечар розпатрело проєкти хтори сцигли на Конкурс за младих у рускей заєднїци и додзелєло средства за софинансованє 11 од 12 проєктох кельо сцигли на Конкурс.
На схадзки хтору водзел предсидатель Роботного цела Сашо Сабадош присутни члени розпатрали проєкти хтори сцигли з вецей местох — найвецей 6 з Руского Керестура, по 2 з Коцура и Вербасу, и по єден з Дюрдьова и Шиду и на нїх розпоредзели 300 000 динари кельо виношел буджет за тогорочни Конкурс.
На схадзки догварене же у идуцим тижню будзе розписана явна поволанка младим за одход на екскурзию. хтору софинансує Роботне цело. Того року то будзе до Польскей на Фестивал „Лемковска ватра” у Ждинї хтори будзе од 20. по 22. юлий, а першираз будзе у форми кампованя.
За осем до дзешец места приявиц ше годни млади з наших местох од 18 по 30 роки, хтори уписани до Окремного виберацкого списку и ище нє були у тих крайох. Явна поволанка будзе обявена у руских медийох и на дружтвених мрежох, а будзе тирвац по 20. юний.