НОВИ САД – З нагоди вчерайшого подписованя контрактох з вецей як сто польопривреднїками з териториї АП Войводини котри достали безповратни порушуюци средства на основи трох конкурсних линийох Покраїнского секретарияту за польопривреду, водопривреду и лєсарство, ресорни секретар мр Вук Радоєвич поручел же нїґда дотераз буджет за польопривреду нє бул векши, же предвидзени и нови мири аґрарней политики котри би мали допринєсц унапредзеню аґрару, та же за даєдни з нїх безповратни средства и до 70 одсто.
Вчера подписани контракти за софинансованє инвестицийох до опреми за хладзальнї, машини, опрему за преробок олєяркох и сушари за ароматични, присмачни и лїковити рошлїни, потим за опреманє статкарских фармох, та за софинансованє инвестицийох до пчоларства.
Радоєвич гварел же за шицки три мири аґрарней политики, односно три конкурси, обезпечени вецей безповратни порушуюци средства, хтори у вельким чишлє достали польопривреднїки младши од 40 роки и жени котри ношителє реґистрованого польопривредного ґаздовства.
За конкурс за софинансованє купованя опреми за хладзальнї, за сушари, купованє машинох за пририхтованє продуктох на тарґовище видвоєни штири раз вецей пенєжи як 2016. року.
Як резултат того, вчера подписани 32 контракти з реґистрованима польопривреднима ґаздовставми, цалосна вредносц инвестициї скоро 100 милиони динари, а учасц Секретарияту нєполни 47,5 милиони динари. То обезпечи скоро 3 000 квадратни метери нових хладзальньох, а за вибудов хладзальнї за овоц средства достанє и рускокерестурске подприємство „Юарбис”.
Друга конкурсна линия була за опреманє статкарских фармох и за ню плановани 70 одсто вецей средства як прешлого року. Подписани 11 контракти, цалосней вредносци блїзко 14 милиони динари, з учасцу Покраїни з нєполнима седем милионами. Средства буду вихасновани за опреманє седем фармох швиньох, єдней овцох и трох фармох рогатого статку.
Треца конкурсна линия ше одноши на розвой пчоларства за купованє нових ройох пчолох и пчоларскей опреми, за цо у тим року опредзелєни 15 милиони динари. Вчера подписани контракти зоз 61-им хасновательом средствох за вецей як 10 милиони динари.