НОВИ САД – Покраїнски секретар за польопривреду, водопривреду и лєсарство мр Вук Радоєвич вчера, 15. септембра, уручел 94 контракти младим польопривреднїком за софинансованє инвестицийох у польопривреди, на основи конкурсу за потримовку младим у руралних штредкох на териториї АП Войводини у 2017. року.
Радоєвич наглашел же то нова инвестиция до польопривреди, вредносци 165 милиони динари, з учасцу ресорного секретарияту од 100 милиони динари.
– То мира аґрарней политики хтору перши раз запровадзуєме и з ню конкретно стимулуєме младих парастох до 40 роки, а и пре доприношенє пременки демоґрафскей слики валалох у Войводини – наглашел Радоєвич.
Покраїнски секретарият з тим конкурсом потримал розвой примарней рошлїнскей и статкарскей продукциї, алє и преробок меса, млєка, овоци, желєняви и грозна. Секретарият 75 одсто средствох младим парастом виплаци авансно, а 25 одсто по реализациї проєктох. Минимално додзельовани коло 500 000, а максимално 1,2 милиони динари.
Ресорни секретар тиж понформовал же з 94-ох контрактох, 44 подписани зоз женми, исто тельо и з младшима од 25 роки, а медзи хаснователями средствох по тим конкурсу 24 особи маю закончено високу школу.