КУЛА – З палєньом фестивалских факльох и дзвиганьом фестивалскей застави опрез Културного центру, у Кули вчера, 16. юния, почал 59. Републични фестивал аматерских театрох Сербиї, хтори тирва по соботу, 24. юний.
Пред шветочносцу опрез Културного центру, у Подобовей ґалериї тей установи у рамикох Фестивалу отворена вистава малюнкох подобового уметнїка Шандора Керекеша зоз Суботици, а о його роботи бешедовал историчар уметносци Миле Тасич зоз Суботици. Присутних на отвераню вистави привитал секретар Културно-просвитней заєднїци Општини Кула Сава Предарович, а у музичней часци наступела млада уметнїца з Кули Ивана Ґруїчич.
Фестивалски огень того року запалєла ґлумица кулского ансамблу Ксения (Лазор) Вукореп, а заставу на ярбол подзвигнул ґлумец Бранислав Кович з Боґатичу.
Тогорочни Фестивал отворел предсидатель Союзу аматерох Сербиї и подпредсидатель Народней скупштини Веролюб Арсич, шицки театрални ансамбли и домашню публику у Кули привитал предсидатель Скупштини општини Кула Велибор Милоїчич, а на шветочним отвераню бешедовала и позната ґлумица Ана Софренович з Беоґраду, котра як млада ґлумица-аматерка тиж наступала на Републичним фестивалє у Кули.
У змагательней конкуренциї участвую аматерски театрални ансамбли з Мачванского Прнявору, Беоґраду, Червинки, Лебанох, Крущичу, Велькей Плани, Рачи и Кули, а после преглашеня побиднїкох, Фестивал на соботу, 24. юния завре госцуюца представа Театру младих з Нового Саду.
З кулскей општини на Фестивалє участвую аж три представи – „Малогражданска свадзба” Б. Брехта, у режиї Радоя Чупича Театру „Стеван Сремац” з Червинки; „Каньош Мацедонович” В. Оґнєнович, у режиї Деяна Цицмиловича Драмского студия „Луча” КУД „Крущич” з истоменого места и „Трактат о служнїцох” Б. Чиплича, у режиї Драґана Остоїча Културного центру Кула.
Представи оценює жири у хторим режисер и ґлумец Мирослав Бенка зоз Старей Пазови, театролоґ мр Мирослав Радонїч, з Нового Саду и ґлумец Миломир Неделькович з Кралєва.
Шицки представи ше виводзи на сцени Културного центру Кула на 20 годзин, а Фестивал орґанизую Союз аматерох Сербиї и Културно-просвитна заєднїца Општини Кула, под покровительством Општини Кула.