РУСКИ КЕРЕСТУР – У Старей школи у Руским Керестуре вчера, 15. авґуста, почал Турнир поднїмательох у малим фодбалу, у орґанизациї керестурских привреднїкох.
Змагаю ше дзешец екипи, а бавя, кажде з каждим, роботнїки зоз керестурских и єдней кулскей фирми.
Вчера бавени три змаганя, а у першим Тапетария „Мая” победзела екипу „Тина Ентериєри” зоз 4:2, у другим „Комфорт” екипу Тапетерия „Еуро”-ЯКП „Руском” зоз 5:2, док у трецим змаганю бавели „Хома намештай” и „Клуб 10”, а резултат бул 1:8.
Попри нїх, на Турниру ше змагаю и „Електромонтажа”, „Вортекс колор”, Намештай „ВиС” з Керестура, як и Лимар „Мандич” з Кули.
Змаганя починаю од 20 годзин, а уход шлєбодни.
Турнир будзе тирвац од пейц до седем днї, з тим же през викенд нє будзе змаганя.
Орґанизаторе на тоту идею пришли по упатраню на подобни турнир хтори у Керестуре отримани пред вецей як дзешец роками, а як од нїх дознаваме, його циль, насампредз, друженє и розвага, та и награди буду символични.
