НОВИ САД – Нєшка на схадзки Покраїнскей влади, хтору водзел єй предсидатель Иґор Мирович, утвердзена програма явней розправи о Нарису покраїнскей скупштинскей одлуки о утвердзованю и шветочним означованю Дня АП Войводини и других шветох од покраїнского значеня.
На схадзки предложене же би ше Дзень АП Войводини шветочно означовало 25. новембра, кед 1918. року Велька народна скупштина у Новим Садзе преглашела присоєдинєнє войводянских обласцох Кральовини Сербиї.
У АП Войводини, як датум од окремного значеня, предклада ше же би ше означовало 15. май, з нагоди Майскей скупштини отриманей у Сримских Карловцох 1848. року, на хторей преглашене стварянє Сербскей Войводини, и 10. децембер – Медзинародни дзень людских правох, кед Зєдинєни нациї 1948. року усвоєли Универзалну декларацию о людских правох.
По прилапеней програми, явна розправа будзе отримана 3. априла у Руми, 10. априла у Зренянину и 17. априла у Новим Садзе.
Tекст предкладаня одлуки будзе обявени на сайту Покраїнского секретарияту за културу, явне информованє и одношеня з вирскима заєднїцами www.kultura.vojvodina.gov.rs. Зауваги, предкладаня и суґестиї мож послац тому секретарияту на имейл danapv@vojvodina.gov.rs лєбо прейґ пошти на адресу Булевар Михайла Пупуина 16, 21 000 Нови Сад.