БАРДЕЙОВ/СРИМСКИ КАРЛОВЦИ – Од 24. по 27. август у Бардейове у Словацкей отримани 46. Медзинародни Бардейовски саям, през историю бул аж 667. по шоре, а на Сайме участвовали и представителє Сримских Карловцох, як єдного зоз збратимених городох з Бардейовом, дознава Рутенпрес од члена делеґациї Општини Срмски Карловци Велимира Паплацка.
На городскей площи свойо продукти на Сайме викладали вецей як 500 продукователє и тарґовци роби широкого трошеня, як и вина з 15 жемох у окруженю и збратимених городох з Бардейовом з Европи, медзи нїма вино и други продукти викладал и Мирко Веселинович з Винариї „Бенешек и Веселинович” зоз Сримских Карловцох.
На Сайме були представителє 15 городох-партнерох, котрих приял и городоначалнїк Бардейова Борис Ганущак, медзи нїма и делеґацию Сримских Карловцох.
Як гварел Паплацко, на сходзе бешедоване о дальшим сотруднїцтве збратимених городох у шицких обласцох живота и роботи, а порадзене же делеґация з Бардейова Карловци нащиви од 8. по 10. септембер, под час „Карловацкей оберачки грозна”.
