РУСКИ КЕРЕСТУР – Роботи на вонкашньосци Катедралней церкви св. о. Миколая у Руским Керестуре предлужени, а за нїх потребне ище коло 10 одсто пенєжу зоз 70 000 еврох, кельо буду виношиц цалосни трошки тей роботи – дознава Рутенпрес од пароха о. Михайла Малацка.
По його словох, трошки векши як предвидзене понеже ше указали и други нєдостатки хтори ше мушело одклонїц, як цо то погнїти удзверя, заменєни бакар на преднєй часци, од влаги ше санировало сакристийну часц церкви, а уведзена и вентилация до крипти дзе поховани владикове.
Пенєж за тоту вельку роботу з найвекшей часци обезпечени од донаторох з керестурскей парохиї, потим з иножемства, а 600 000 динари достати од Канцелариї за одношеня з Церквами и вирскима заєднїцами Министерства правди, на основи конкурованя.
Пре нєдостаток пенєжу, парохия знова конкуровала и до спомнутей канцелариї, а поволує и донаторох же би, хто може, з пенєжнима донациями допомогли закончиц тоту вельку роботу.