КОЦУР – Всоботу, 18. марца, Велька сала Месней заєднїци у Коцуре була преполна на промоциї фотомоноґрафиї „Сто роки шестрох Служебнїцох у Коцуре“, у рамикох означованя 125-рочнїци снованя заєднїци шестрох Служебнїцох на тих просторох.
Промоция почала з молитву „Отче наш“, хтору водзели Таня Мученски и Оксана Недич, а модератор програми Микола Шанта у мено шицких присутних шестром повинчовал ювилей. Тиж привитал и присутних госцох – монахох василиянох з України, на чолє з протоигуменом о. Андрийом, шестри з України, Нємецкей и Италиї, на чолє з ґенералну настоятельку шестрох Служебнїцох з Риму ш. Терезу Слота, як и провинцийну настоятельку ш. Мартину Кмита.
Микола М. Цап винєсол ключни историйни факти вязани за живот манастиру и шестрох Служебнїцох, а ш. Михаила Воротняк, котра найвецей робела на обявйованю тей фотомоноґрафиї, обрацела увагу на особи котри творели заєднїцу шестрох у Коцуре и подзековала родичом котри були порихтани дац свойо дзивки на службу Богу и народу.
Промоцию збогацела и музична точка Ани Римаровей, як и рецитациї виронаучних дзецох Сари Бесерминї и Ивана Ґайдош, а у голу Месней заєднїци була вистава малюнкох хтори на тоту тему намальовали дзеци на роботнї у орґанизациї коцурского Здруженя младих „КУМ“.
По програми на Вельким теметове присутни на промоциї обишли гроби о. Андрия Лабоша мл., котри бул инициятор снованя манастиру у Коцуре и Дионизия Дорокхазия, котри шестром Служебнїцом за вибудов нового манастиру подаровал свою вельку хижу на Вельким шоре. На Старим теметове отримана панахида за покойни шестри Служебнїци, а цалосна програма у Коцуре закончена з Вечурню у грекокатолїцкей церкви.
Видаванє фотомоноґрафиї „Сто роки шестрох Служебнїцох у Коцуре“ финансовала Општина Вербас, а спомнутей ш. Михаили у виробку фотомоноґрафиї помогли о. Михайло Шанта, ш. Мария Пелих, Микола М. Цап, Микола Шанта и Танита Ходак.