НОВИ САД – Прешлого тижня прилапени Покраїнски акцийни план за обезпечованє роботи у 2017. року, хтори дефинує цилї и приоритети политики у тей обласци и утвердзує програми и мири з хторима ше звекша занятосц у Войводини. Як сообщела Покраїнска влада, приоритети Акцийного плану буду укладаня до людских ресурсох, порушованє социялней инклузиї на тарґовищу роботи и отверанє нових роботних местох.
За миру самообезпечованя роботи Покраїнски секретарият за привреду и туризем видвоєл 50 милиони 500 000 динари, дзе субвенция виноши од 182 000 до 456 000 динари. За анґажованє нєзанятих опредзелєни 60 милиони 78 379 динари, а роботодавателє по роботнїкови достаню од 183 000 до 202 000 динари.
У тим року за явни роботи видвоєни 15 милиони динари, а за НИС а.д. Нови Сад наменєни 32 милиони 921 620 динари за софинансованє обезпечованя роботи за 86 нєзанятих без роботного искуства у фаху.
– З мирами активней политики обезпечованя роботи, хтори Секретарият того року запровадзи з Националну службу за обезпечованє роботи, Едукативним центром Нови Сад, БСЦ Центром за дїловне стандардизованє и сертификованє, локалнима самоуправами, та средствами од 158 милиони 500 000 динари, можеме посцигнуц резултати хтори водза ґу отримуюцому обезпечованю роботи – гварел на представяню Акцийного плану покраїнски секретар за привреду и туризем Иван Дьокович.