НОВИ САД – Вчера, 3. мая, праве на Шветови дзень шлєбоди медийох, наполнєли ше 18 роки як у НАТО-бомбардованю подполно знїщени будинок и векша часц опреми нєшкайшей Радио Телевизиї Войводини (РТВ) на Мишелуку. У бомбардованю нє було людски жертви, алє направена барз велька материялна чкода, и од теди покраїнски явни сервис роби як подквартельош, алє и надалєй, попри на сербским, емитує програму и на язикох велїх националних заєднїцох котри жию на териториї Войводини.
Тераз тирва процес вибудови нового будинку Радио телевизиї Войводини, о чим технїчни директор РТВ Йован Бачич вчера гварел же о 10-15 днї почнє розчисцованьом звалєного будинку, на чиїм месце будзе збудовани нови.
Як гварел Бачич, проєктно-технїчна документация закончена, а обезпечни и средства за перши рок вибудови – по 400 милиони динари з буджетох Републики Сербиї и Автономней покраїни Войводини.
Бачич наглашел же нови будинок РТВ будзе присподобени ґу сучасним технолоґийом и збудовани по високих стандардох енерґетичней ефикасносци.