РУСКИ КЕРЕСТУР – На порядней Рочней скупштини рускокерестурского Добродзечного огньогасного дружтва (ДОД) хтотра всоботу, 25. фебруара отримана у Огньогасним доме, поведзене же прешлого року у Керестуре були лєм два, алє барз вельки огнї и з вельку материялну чкоду, понеже влєце цалком згорела єдна векша хижа и коло хижи, аж и дзепоєдни польопривредни машини, а познєйше нє цалком и єден квартель.
Як у звиту о роботи за 2016. рок гварел предсидатель ДОД Михайло Рац, огньогасци орґанизовали и порядне препатранє комбайнох, тракторох и процивогньових апаратох пред жатву, под час жатви дежурали у Доме, члени ДОД активно участвовали на значнейших месних манифестацийох, а на початку школского рока школярох перших и других класох ОШ упознали и з охрану од огня.
Од Ротари-клубу Кула, чийо члени прешлого року були госци у керестурским ДОД, достали огньогасне черево, а Рац визначел и барз добре сотруднїцтво з Месну заєднїцу и другима здруженями. И попри чежкей материялней ситуациї, у прешлим року им ше удало адаптовац квартель за домара и обилїц вельку салу у Огньогасним доме.
Найвекши проблем у роботи и надалєй бул нєдостаток пенєжу, и у прешлим року цалосни приход керестурского ДОД виношел дацо вецей як 86 500 динари, а розходи нє цали 89 000 динари.
Попри домашнїх членох ДОД и представительох дзепоєдних месних здруженьох, на схадзки Скупштини присуствовали и представителє Општинского огньоганого союзу и професийней огньогасней єдинки з Кули, та представителє ДОД з Коцура, Петроварадину, Пиньвиц и Крущичу.
На схадзки придати и окремни дарунок од Любици Крняїч з Огньогасного союзу Войводини – рижни забавни бависка за дзеци и младших хтори промовую огньогаство, як єден зоз способох прицагованя дзецох за будуцих огньогасцох.
