БЕОҐРАД – Предсидателє Синдикату образованя Сербиї, Синдикату роботнїкох у просвити Сербиї и фаховного синдикату „Нєзависносц” оценєли же и после звекшаня плацох за шейсц одсто штредня плаца у просвити ище вше менша од штреднєй у держави, бо штредня плаца у просвити 42 320 динари, а штредня плаца на уровню держави 45 767 динари.
Синдикати сообщели же и после звекшаня минималней цени роботи плаци роботнїкох у просвити котри маю треци и штварти ступень фаховей приготовки ище вше менши од минималца и виноша 22 504 динари.
Представителе синдикатох вимагаю звекшанє коефициєнту за занятих котри маю треци и штварти ступень за 8,2 одсто, а у штвартим кварталє звекшанє шицких коефициєнтох. Вимагаю и виплацованє новорочних наградох и заключованє колективних контрактох зоз занятима у обласци високого образованя и предшколских установох.
Предсидатель синдикату „Нєзависносц” Томислав Живанович гварел же дозреваю условия за штрайк. Зоз звекшаньом плацох за шейсц одсто нє посцигнути уровень плацох яки бул пред 2014. роком, бо су ище вше пейц-шейсц одсто менши од реалней вредносци плацох пред трома роками.
Уния синдикатох просвитних роботнїкох Сербиї (УСПРС) вчера у беоґрадским Доме синдикатох орґанизовала Святосавски протест. Предсидателька УСПРС Ясна Янкович гварела же ше проблеми у просвити громадза, а представителє власци у Сербиї реаґую лєм кед ше спомнє штрайк, лєбо протест.