ДЮРДЬОВ – Пред Фестивалом жридлового шпиваня „Най ше нє забудзе” традицийно и того року на 16 годзин пред будинком домашнього Дружтва у дворе отворена вистава „Стари ремесла”.
Ремеселнїки на вецей штандох виложели свойо продукти и указовали ориґинални стари алат. Вистава була интерактивна, бо шицки ремеселнїки дзечнє указовали нащивительом як ше дакеди робело на стародавних машинх котри и дзень-нєшка у функциї.
Свойо продукти викладали колєсаре, ковалє и тишлїре зоз Руского Керестура и цукрарка зоз Чуроґу, а могло поопатрац лєбо купиц и кнїжки на руским язику хтори видала Новинско-видавательна установа „Руске слово”.
Вецей фотоґрафиї можеце поопатрац у нашей фотоґалериї.
