За продукцию лїсковцох треба мац сцерпеня, понеже за перши плоди роботи и часу котри ше уклада до їх продукциї, треба причекац и даскельо роки. За Желька Маґочового то нє бул проблем кед ше, пред 9 роками, упущел до тей роботи, понеже ше добре презнал о продукциї тей култури.
Маґочово зоз Коцура уж 12 роки, тераз на шейсцох голоьтох ховаю лїсковци, а аж после пейцох рокох видзели перши резултати своєй роботи.
– Перше лїсковци посадзел оцец, пред дванац роками, а вец супруга и я вєдно зоз шестру и жецом, пред дзевец роками преширели продукцию. Оцец засадзел гольт и пол, а ми тераз маме посадзене 4,5 гольти – гварел Желько. – За успишну продукцию лїсковцох потребне насампредз, добре ше упознац зоз тоту културу. Ми ше од початку о шицким радзели з єдним професором на Польопривредним факултету, од котрого зме купели и древка.
Професор их з початку поряднє обиходзел, а посадзели зме три файти Тонди и Истарски дуги, шицки ше прияли и тримам же ше, окрем квалитетного обрабяня жеми, найважнєйше добре поинформовац о шицким – визначел Желько.
Коло лїсковцох, як и коло каждей култури котру ше обдумано продукує єст роботи. Роботи коло лїсковцох починаю у фебруару кед ше древка орезує, та по штредок октобра кед ше збера плоди.
ПОЛНИ ЕФЕКТИ ПОСЛЕ 5-6 РОКОХ
Укладаня з початку досц вельки, понеже окрем древкох и огради, цо найвекша финансийна ставка, муши ше анализовац жем, добре погноїц, досц глїбоко поорац, и вец наступа период провадзеня, прекармйованя, а после трох або штирох рокох мож очековац и перши плоди.
– Треба мац сцерпеня, чекац же би прешол тот початни период, так повесц, без резултатох, алє кед ше шицко роби як треба, труд ше виплаци. Перши урожай за предай зме мали после дас 5-6 рокох. Пред тим було тельо же зме дома нє мушели куповац лїсковци за колачи. За полни ефект муша прейсц дас седем роки, а вец резултати вельо векши и аж теди ше робота и уложени час виплаца – гвари Магоч.
Наша жем коло 95 одсто лїсковцу увожи, та за тих котри маю условия и дзеку, єст перспективи же би успишно пласовали свою робу. Желько Маґоч гвари же вредзи апликовац за безповратни средства котри дава Министерство польопривреди, бо и вони пред шейсцома роками апликовали и достали назад пенєж котри уложели за купованє древкох. Того року купели уцицовач за лїсовци, та и ту чекаю одвит зоз Министерства же чи достаню, односно чи им враца пенєж и за тоту инвестицию.
МЕХАНЇЗАЦИЯ ВЕЛЬО ОЛЄГЧАЛА
Попри укладаня до продукциї лїсковцох, треба буц порихтани и на роботу коло нїх. Желько ше, вєдно зоз фамелию, стара ше о тим же би лїсковци вше мали цо им потребне, а кед придзе час за оберанє, гвари же потераз оберали ручно, а од того року хасную и механїзацию.
– Окрем того же лїсковци котри одпадню треба позберац ручно, ми хаснуєме и ткв. уцицовач за лїсковци зоз котрим тота робота идзе вельо швидше, алє их вец треба чисциц и сотрировац. Нєшка найвекши проблем пласман. Гоч лїсковци драги, у предавальньох и на пияцу, за пласман векшого количества лїсковцох цена нїзша, або тоти цо одкупюю векше количество, часто збиваю цену. Було би барз добре, кед би ше держава остарала же бизме, як продукователє тей култури могли по реалней цени предац лїсковец и наплациц свою роботу, алє то нє проблем лєм при лїсковцох, алє и при других културох, та вец як и шицким, так и нам – роздумує Желько.
СТУДЕНТИ ПОМАГАЛИ И УЧЕЛИ
Кед слово о едукациї, Желько Маґоч ше найвецей консултовал зоз фаховцами зоз Польопривредного факултету, читал о продукциї, а на їх фамелийни парцели професор приводзел и студентох зоз Факултету же би у рамикох настави надпатрали и провадзели пестованє лїсковцох. Так Желько мал фахове надпатранє, а цала фамелия научела вельо о тей польопривредней култури.