ВЕРБАС – Совит Фестивалу поезиї младих у Вербаше тих дньох розписал конкурс за участвованє младих поетох з реґиону на тогорочним 49. Фестивалє поезиї младих, хтори у Вербаше будзе концом мая. Розписани и конкурс за младих подобових уметнїкох за виставу „Палета младих”, хтору ше отримує у рамикох Фестивалу. Обидва конкурси тирваю по 1. април.
На конкурсу можу участвовац поетове до 27 роки з циклусом од 10 нєобявених писньох на сербским, лєбо на язикох националних меншинох (з прекладом/прешпивом на сербски). Циклус писньох треба послац у штирох прикладнїкох под шифру (ришенє шифри у окремней коверти), на адресу: Народна библиотека „Данило Киш” Вербас, Фестивал поезиї младих, Маршала Тита 87. Як и дотераз, найлєпшому поетови будзе друкована кнїжка.
На конкурс за „Палету младих” можу конкуровац подобово уметнїки тиж до 27 роки живота. Тема и технїка роботи шлєбодна, форма роботи штафелайна, а авторе перше маю послац фотоґрафиї циклусу од 10 роботох у електронскей форми, на адресу paletamladih@gmailcom, з основнима податками о роботох и кратку биоґрафию. Тоти котри войду до узшого вибору, ориґинални роботи маю доручиц найпознєйше по 1. май.