ШИД – Вчера, 9. мая, на 56 схадзки Општинска рада (ОР) на предлог комисийох розподзелєла средства по конкурсу за здруженя и вирски заєднїци у шидскей општини, алє Драґан Ґутич, член ОР хтори бешедовал новинаром на конференциї за новинарох нє назначел точно кому кельо средства додзелєни.
ОР на схадзки прилапела инициятиву же би ше порушало поступок отвераня малогранїчного преходу помедзи Сербию и Републику Горватску односно Ямену у шидскей општини (хтора на тромеджи Сербиї, Горватскей и Босни и Герцеґовини) и Рачиновцох у Горватскей.
Тиж принєшени и одлуки о менованю назвох 70 улїцох и улїчкох у валалох шидскей општини и самим Шидзе.
Вчера на сайту Општини Шид обявена и одлука о розподзельовану средствох з обласци култури хтори ше финансую з општинского буджета по хторей розподзелєни вкупно 3 милиони 558 000 динари, а за порядну роботу Руска матка достала 100 000 динари, КПД „Дюра Киш” зоз Шиду 250 000 динари, КПД „Иван Котляревски” з Бикичу 200 000 динари и КПД „Драґутин Драґен Колєсар” з Бачинцох 50 000 динари.