ЗОМБОР/РУСКИ КЕРЕСТУР – Розправа о новим Напредок пририхтаним планє реорґанизациї (НППР) „АБЦ ФУД” з Руского Керестура, котра отримана вчера у Привредним судзе у Зомборе, одложена штварти раз од кеди нови План предложени.
Розправа одложена на вимогу адвоката Деяна Цвияновича котри заступал предкладателя НППР „АБЦ ФУД”, а з чим ше зложели и шицки присутни поверителє котрих тераз було у вельо векшим чишлє, як цо на було хторей потераз заказаней розправи.
Предкладатель вимагал одкладанє, понеже суду придали вименки НППР, до котрих пришло прето же у децембру прешлого року менше число бувших роботнїх достало пресуду з котру ше прилапює їх статус поверительох, котри до теди бул оспорйовани. То дополнєнє поверительох и звекшанє длуства у „Д класи” за даскельо проценти. Друга причина за одкладанє була же обезпечени поверителє Марфин банки ище вше нє маю потребну согласносц за гласанє.
На тей розправи нє одредзени анї приблїжни датум отримованя идуцей розправи, прето же терашньому предликвидацийному управительови Милошови Шешевичови предшедуюца судийка Биляна Перич наложела же би превжал потребни мири анґажованя фахового ревизора за виробок нового Позарядового финансийного звиту „Хладзальнї”, понеже прешли вицекол, односно прешло дзевец мешаци од його виробку, та як таки тиж будзе вплївовац на пременки у предложеним НППР.