АПАТИН/РУСКИ КЕРЕСТУР – На першим тогорочним Турниру у рукомету за младши катеґориї до 14 рокох, отриманим всоботу 17. фебруара у Апатину, спортисти Рукометного клубу „Русин” у двох змаганьох дали 40, а прияли 36 ґоли.
На турниру у Апатину бавели два змаганя, перше зоз екипу „БСК 2012” з Бачкого Брестовцу, а друге зоз „Далматинцом” з Ридїци. За Русин бавели – Стойков (12), Ґовля (11), Ковачевич (8), Надь (4), Максимович (3), Чордаш (1), Гарди (1), Накич, Дудаш, Няради, Шимек, Гербут, а ґолман бул Зорич.
На змаганю процив „БСК 2012” млади Русиновци однєсли побиду релативно лєгко з резултатом 21:16 (8:9), док друге змаганє зоз екипу „Далматинац” було досц напарте. У остатнїх секундох бависка Русиново рукометаше з нєришеним резултатом препущели нагоду за ґол, а потим з ище єдним датим ґолом победзели процивнїки, та змаганє закончене з резултатом 20:19 (7:7).
Млада селекция Русинових рукометашох до 14 рокох ше находзи у Першей лиґи А ґрупи, вєдно з екипами „Апатин”, „Зомбор”, „Далматинац”, „Ґрафичар” з Бездану, „Спартак” зоз Суботици” и „БСК 2012”.
Русиновим рукометашом остало одбавиц ище пейц турнири, з котрих єден будзе у Керестуре 31. марца, а рукометашох за змаганя пририхую Владимир Планчак и Дзвоно Планчак.