ОПШТИНА ШИД – З нагоди наиходзацого швета, Святого о. Миколая, у грекокатолїцких церквох у шидскей општини внєдзелю було шветочно, бо Святи Миколай нащивел церкви и дзецом подзелєл дарунки.
У Бачинцох после Служби Божей, хтору служел парох о. Дарко Рац, Миколай подзелєл дзецом 12 пакецики хтори обезпечела парохия и добротворе.
У вечарших годзинох Миколай перше нащивел церкву у Шидзе дзе подзелєл 48 пакецики, потим бул у церкви у Беркасове и подзелєл 18 пакецики, а на концу у церкви у Бикичу подзелєл дзецом вецей як 40 пакецики.
У Шидзе, Беркасове и Бикичу, школяре хтори ходза на годзини руского язика з елементами националней култури як виборного предмету и виронауки, а хторих пририхтали о. Михайло Режак, наставнїца Златка Сивч Здравич и Вера Дупало, виведли пригодни програми у хторих ґлумели и шпивали, а наступела и Младша шпивацка ґрупа КПД „Дюра Киш“ зоз Шиду.
