Священїки з Румуниї нащивели керестурски Каритас

автор мст
1k Опатрене

РУСКИ КЕРЕСТУР – Рускокерестурску парохию св. оца Миколая вовторок, 12. септембра, нащивели дзевецме грекокатолїцки священїки з Румуниї. После Вечаршей Служби Божей госци нащивели Каритас, дзе ше упознали з каритативну роботу у Керестуре.

Госцох привитал домашнї парох о. Михайло Малацко и презентовал им роботу Каритасу од початкох, 70-рокох прешлого вику, по нєшка. Парох наглашел же Каритас то вислов парохиї, а його волонтере лєм рука хтора доходзи до особох котрим потребна материялна помоц, алє и орґанизованє стретнуцох за дзеци, младих и стари особи. На представаню парохийного Каритасу присуствовали и керестурски капеланє о. Владимир Медєши и о. Михайло Шанта, представителє коцурского Каритасу як и домашнї волонтере.

2-Karitas-02

Представителє владического Каритасу з обласци Мараморош у Румуниї домашнїм представели свою роботу. Як гварели, прейґ проєктох робя з тима котри на даяки способ „вируцени” з дружтва – з младима занєдзбанима од родичох, загроженима з  дроґу и проституцию, як и зоз старима особами и з анонимнима алкоголичарами.

– Ви за нас приклад як мож ришовац проблеми. Наздаваме ше же и нашо парохиї, так як ваша, ожию Каритас, бо вєдно робиме за добро – гварели госци у Керестуре.

Представителє Каритасу з Мараморошу з тей нагоди поволали керестурских волонтерох же би их нащивели у Румуниї, а под час їх пребуваня у нашей жеми нащивя и каритаси у Сенти, Шабцу и други.

 

 

ПОВЯЗАНИ ТЕКСТИ