НОВИ САД – Покраїнски секретар за польопривреду, водопривреду и лєсарсто мр Вук Радоєвич вчера уручел 169 контракти польопривреднїком котри витворели право на безповратни средства по основи конкурсох за додзельованє средствох за залївни системи и вибиванє експлоатацийних студньох у Войводини у 2017. року. З польопривреднїками з местох кулскей општини подписани 12 контракти, медзи нїма и з Керестурцами.
За медиї Радоєвич виявел же цалосна вредносц субвенцийох за залївни системи 85 милиони динари, а зоз 169 подписаних контрактох аж 86 спадаю до катеґориї з правом на 70 одсто безповратних средствих.
– З нєшкайшима контрактами зоз залївнима системами буду обезпечени нови 642 гектари. Понеже то пияте подписованє контрактох по основи того конкурсу, цалосни инвестиция до залївних системох у тим року виноши 336 милиони динари, з учасцу Покраїнского секретарияту з вецей як 200 милиони динари. Вєдно подписани 470 контракти, а нови 2 300 гектари под залївну систему – гварел Радоєвич и надпомнул же з ребалансом буджету за тот рок предвидзени 405 милиони динари за софинансованє по тим конкурсу, цо 35 одсто вецей средства у одношеню на прешли рок.
Радоєвич наявел и розписованє конкурсу за средства за купованє нових тракторох, погонских и приключних машинох, цо новосц у роботи того секретарияту, а конкурс будзе розписани у наступних 10 дньох.