НОВИ САД – Покраїнски секретар за културу, явне информованє и одношеня з вирскима заєднїцами Мирослав Штаткич, зоз сотруднїками, вчера бешедовал зоз заменїком шефа Мисиї ОЕБС-у у Сербиї Майклом Уєхаром о информованю на язикох националних меншинох у Войводини и наглашел же потримовка информованю на язикох меншинох важни сеґмент очуваня їх културного и националного идентитету, а то єдно з фундаменталних опредзелєньох Секретарияту и Покраїнскей влади вообще.
– О тим нам гутори и факт же того року за потримовку информованю на язикох националних меншинох буду унапрямени 82,5 одсто з цалосних средствох потримовки медийом у Покраїни. Медзитим, информованє то нє єдини сеґмент з хторим ше потримує очуванє идентитету националних меншинох, а з тим и мултинационалносц и мултиконфесийносц у Войводини. Подобно робиме и у других обласцох за хтори компетентни наш Секретарият – гварел Штаткич.
По словох помоцнїка секретара за явне информованя, медиї и аналитику Дьордя Вукмировича, потримовку информованю на язикох националних меншинох ше витворює у трох сеґментох – з директним субвенционованьом 21-ого новинского меншинского виданя у дзевец видавательних установох, з конкурсним софинансованьом проєктох приватних медийох чийо снователє нєвладово орґанизациї лєбо здруженя гражданох и през програми на меншинских язикох на Явней медийней установи Радио-телевизия Войводини.
Майкл Уєхара виявел же ОЕБС з окремну увагу провадзел процес приватизованя медийох, окреме тих хтори информую на язикох националних меншинох, наглашуюци же ше о тим сеґменту у Войводини окреме водзи рахунку.