ДЮРДЬОВ – По освоєних бодох, спомедзи трох оддзелєньох маломатурантох у дюрдьовскей ОШ „Йован Йованович Змай” Закончуюци испит найлєпше поробели школяре з руского оддзелєня, бо вони осмеро мали вукупни просек 10,36 боди, а поєдинєчно, шицки три тести найлєпше поробела школярка руского оддзелєня Лидия Чапко.
Того року школяре у Дюрдьове посцигли лєпши просек бодох як прешлого и штреднє шицки оддзелєня на Закончуюцим испиту освоєли 9,83 боди. По тестох – зоз сербского язика посцигли 11,03 боди, з руского 11,87, з математики 9,22, а з комбинованого тесту 7,23 боди.
Медзитим, и того року маломатуранти и їх наставнїки у Дюрдьове нєзадовольни же за дзепоєдни одвити на тесту з руского язика нє могли достац по пол бода, як то бул случай на тестох з других мацеринских язикох.
– Одвичательни би за тото мушели мац вецей слуха и дац можлївосц же би за одредзени одвити школяре могли достац и пол бода. Ми, наставнїци руского язика з Дюрдьова, Руского Керестура и Коцура, уж даскельо роки вимагаме праведнєйше бодоване школярох з руских оддзелєньох, котри ше опредзелюю покладац руски язик на Закончуюцим испиту. Бо, за упис до штреднєй школи им важни кажди бод, та и пол бода часто вельо значи, а у терашнєй ситуациї нашо школяре очкодовани – гварела наставнїца руского язика у дюрдьовскей ОШ Мария Самарджич.