КУЛА – ОШ „Петефи бриґада“ з Кули и того року витворює проєкт Функционалного основного образованя одроснутих „Друга шанса“. Заинтересовани кандидати зоз шицких местох у кулскей општини ше можу приявиц до Националней служби за обепечованє роботи у Кули, лєбо до Школи „Петефи бриґада“, на число телефона 723-944. Условиє за упис же би кандидат мал найменєй 15 роки старосци.
Одроснути без законченей основней школи можу безплатно, по прилагодзеней програми, достац два дипломи – диплому законченей основней школи и диплому єдного з понукнутих ремеслох.
Наставна програма подзелєна до двох циклусох: други циклус подрозумює образованє за пияту и шесту класу, а треци циклус за седму и осму класу. Настава почина у другей половки октобра, закончує ше у априлу идуцого року, а єст и мешац жимского розпусту.
Настава тирва по два годзини дньово, по догварки у вечарших годзинох, и прилагодзена є обовязком и мири одроснутих. Обезпечени орґанизовани превоз, лєбо драгово трошки.
По законченю основней школи по тей програми младши од 17 роки образованє можу предлужиц у порядней настави у штреднєй школи, а старши позарядово, тиж безплатно.