КУЛА/РУСКИ КЕРЕСТУР – Школяре ОШ „Петро Кузмяк” з Руского Керестура, як часц екипи кулскей општини, були найлєпши на Окружним змаганю з транспорту школох Заходнобачкого округу и тройо у двох категорийох – Уна Планчак, Леонела Цифрич и Иван Рац ше пласовали на державне, Републичне першенство. З нїма у екипи будзе и Константин Ничетин з кулскей ОШ „Иса Баїч”.
Найлєпша на змаганю з найвецей бодами знова була керестурска школярка Леонела Цифрич, а з керестурскей Школи у екипи кулскей општини була и Милица Малинович у младшей Б-катеґориї, котра завжала друге место, алє ше на Републичне першенство пласовали лєм перши.
На Окружним змаганю з транспорту змагали ше школяре зоз зомборскей, апатинскей и кулскей општини, а гоч були приявени, нє участвовали змагателє з оджацкей општини.
Керестурских школярох за змаганє пририхтал наставнїк Зденко Шомодї, а будзе их пририхтовац и за Републичне, хторе у Беоґрадзе будзе 26. и 27. мая.