Умарла Аґафия Афка Рамач

автор зам
1k Опатрене

РУСКИ КЕРЕСТУР – После длугшей хороти, у зомборским шпиталю штварток, 12. октобра, у своїм 87. року живота умарла Аґафия Рамач з Руского Керестура, у свой час длугорочна активна учашнїца у културним, окреме у театралним живоце Руснацох, односно у нашим Аматерским руским театру/Руским народним театру (АРТ/РНТ) „Дядя”.

Аґафия (дзивоцке Рац, Кренїцкого), народзена 17. юния 1931. року и ище у младосци,  медзи двома шветовима войнами, як шпивачка у тедишнїх хорох була уключена до културного живота у Керестуре, шпивац предлужела и у КУД по Другей шветовей войни, а була активни член и тедишньго надалєкого познатого масовного и успишного Мишаного хору Дому култури Руски Керестур.

Аґафия Рамачова, тета Афка як ю волали и познали и аматере и Керестурци, окреме була активна и зохабела свой паметлїви шлїд у театралним живоце Руснацох и Руского Керестура – як ґлумица, позарядово добра орґанизаторка и руководителька представох, та и як суфлерка. Була єдна зоз сновательох АРТ „Дядя” (з його двома сценами у Руским Керестуре и Новим Садзе), понеже участвовала на главней Сновательней скупштини Театру 1971. року, на хторей була вибрана и до першого Управного одбору АРТ „Дядя”, а член Управного одбору АРТ була ище у єдним мандату, од 1975. року. Од 1973. року Аґафия Рамач була и предсидателька Совиту сцени Руски Керестур АРТ, познєйше на вецей заводи була член спомнутого совиту сцени, як и других орґанох у АРТ, познєйше у РНТ.

Як ґлумица, тета Афка участвовала у єденац театралних представох керестурскей сцени АРТ/РНТ, праве и у його службено першей представи на керестурскей сцени – „Фараонє” Олексия Коломийца, у режиї Дюру Папгаргая, а як ше познєйше указало, ґлумела праве у тих найвекших, найуспишнєйших и найнаградзованших проєктох тедишнього театру, як цо то „Ожалосцена фамелия”, „Остатня станїца”, „Ревизор”, „Опера за три ґроши”, „Подозрива особа”, „Спитованє и свадзба”… За свойо анґажованє, од АРТ/РНТ достала и вецей награди.

Окреме була успишна як руководитель, односно орґанизатор-инспициєнт вецей представох АРТ/РНТ, дзе до вираженя приходзели єй орґанизаторски схопносци, а треба мац у оглядзе же у тедишнї час то векшином були вельки театрални подцаги – масовни ансамбл-представи, з обсяжну сценоґрафию, костимами, численима людзми котри участвовали у цалосним витвореню єдней театралней представи. З педантно нєнаруцуюцо авторитативним способом тета Афка вше успишно покончела шицко цо було потребне и єй зверене, як особа од довирия у АРТ/РНТ, а вецейраз ґлумцом у роботи помагала и як суфлер (шептач) споза сцени. Єй активне анґажованє у РНТ „Дядя” тирвало по 2000. рок, а треба визначиц же у свой час, вироятно теди як єдина жена, була активна и у керестурским Ловарским дружтве „Ярабица”.

Аґафия Афка Рамач будзе похована нєшка, 13. октобра на теметове у Руским Керестуре на 15 годзин.

Най єй будзе вична памят.

ПОВЯЗАНИ ТЕКСТИ