РУСКИ КЕРЕСТУР – У Руским Керестуре вчера, 15. септембра, у 74. року живота умар Юлиян Гербут, длугорочни наставнїк общетехнїчного образованя у Основней школи „Петро Кузмяк” у Руским Керестуре, у хторей препровадзел цали свой роботни вик.
Юлиян Гербут народзени у Руским Керестуре 7. децембра 1943. року, и после дипломованя на Педаґоґийней академиї за предметну наставу у Риєки, на напряму наставнїк технїчного образованя, перше рок робел у школи у Сивцу, а потим од 1. септембра 1966., та по 31. авґуст 2004. року, кеди пошол до пензиї, у Школи у Руским Керестуре як наставнїк общетехнїчного образованя (ОТО), познєйше технїчного.
Як доброго и своєй роботи пошвеценого наставнїка запаметали го ґенерациї керестурских школярох, а велї, дзекуюци и здобутим основом при наставнїкови Гербутови, познєйше постали и рижни майстрове, лєбо позакончовали висши и високи школи з обласци машинства, инжинєрства, будовательства.
Попри порядней настави, у Школи зоз школярами удатно водзел моделарску, будовательну, ОТО-секцию, а окреме добре транспортну секцию, хторей пошвецовал значну увагу, так же дзекуюци и його закладаню, керестурски школяре посциговали замерковани успиху на змаганьох зоз транспорту на рижних уровньох.
У складзе зоз своїм фахом, наставнїк Гербут и його школяре на рижни способи вельо участвовали и у ушорйованю, украшованю и отримованю школских будинкох и просторох, як и у самим валалє.
Юлиян Гербут будзе поховани нєшка, 16. септембра, на 16 годзин з каплїци на керестурским теметове. Най му будзе вична памят.