Анкети о уводзеню униформох до школох указую же половка школох, односно родичох, потримує тото предкладанє, гвари министер просвити Младен Шарчевич. По його толкованю, Министерство просвити би сцело же би униформи були поступнє уведзени до школох по принципу добродзечносци, док ше нє створи критична маса и док ше униформи помали нє прилапи у шицких школох. Найчастейши полемики ше водзи коло того же хто тоти униформи будзе финансовац, кельо униформи треба вообще же би школяр мал, як буду випатрац, зоз якого материялу буду направени. Як гваря у Министерстве, то би нє була класична униформа як дакеди, алє „унификована школска шмата” дзе би ше попри униформи, член школского колективу препознавал и по амблему на нєй.
Понеже кажда металия ма два боки, так ма и тота. Добри боки униформох то менши прицисок же цо облєчиц, зменшованє задзераня, знємирйованя и понїжованя медзи дзецми. У сущносци, социялни розлики нє буду таки обачлїви при єднак облєчених школярох. Подли бок плану то же ше зоз ношеньом униформох гартуши индивидуалносц школяра, прави додатни трошки за родичох, алє и звекшани ризик же дзецко будзе малтретироване од других праве пре исту тоту униформу, як наприклад, пре „погришни” фодбалски дрес. .Наймоцнєйши акцент положени на зменшованє социялних розликох при школярох. Медзитим, ту ше заобиходзи питанє других стварох котри ище баржей визначую розлики: Мобилни телефон? Патики? Спомнїме лєм тоти очиглядни. Можебуц и треба увесц униформи, алє сом скоро цалком сиґурна же ше зоз тим нє зменша подзелєнє дзецох на худобних и богатих, а окреме же ше нє зменша насилство по школох. У школи ше дзеци образую, а воспитанє приноша з обисца. Родичи тоти котри треба же би научели дзецко же материялне богатство нє мерадло чловека. Тото цо би, у ствари, наисце требало вимагац и промововац, то пристойносц и толеранция. А толеранциї ше особа найскорей научи так же будзе прилапйовац розличних од себе. Довесц ше до шора мож и зоз компромисним ришеньом, як цо би то бул Кодекс о облєканю, по хторим до школи нє мож у мини-сукньох, узких маїцох зоз деколтеами, шорцох. Школа образовна институция, а нє плажа лєбо кафич, а анї є нє дискотека.
Сами по себе, школяре вше найду способ же би витворели и зачували свою индивидуалносц, а школа як институция би требала потримовац право на розличносц, же би нїхто нє чувствовал страх пре иншаки стил, фризуру, чи музику яку слуха. Кажде ма право ношиц тото цо сце. Яка поента у тим же би шицки єднак випатрали? И у тим ше може почувствовац утаргованє шлєбоди, а то напевно, нє демократични приступ. Школярски униформи здогадую на тоталитаристичну политичну систему котра пропаґирує же зме шицки исти и єднаки, а знаме и сами же то нє точне. Место єднакосци, у ствари доставаме безособносц. Щиро препоручуєм здогаднуц ше Пинк Флойда и його The Wall.