КОЦУР – У Коцуре прешлого викенду отримана волонтерска акция „Едукация младих Руснацох” котру орґанизовало Коцурске здруженє младих „КУМ”.
На акцию пришло штерацецеро младих зоз шицких наших местох, алє и зоз Беоґраду, Шабцу, Нишу и Любляни.
У рамикох Акциї млади учели як ше пише проєкти, през роботу и рекреацию ше дружели и медзисобно упознавали, а обишли и Коцур, були на базену и гуманитарним рок концерту у Вербаше.
На едукацию, прейґ програми „Ерасмус плус” пришли и млади зоз Словениї, а волонтере зоз Босни и Герцеґовини, нє пришли. Учашнїки були змесцени у просторийох Каритасу и на Пелетовим салашу.
Програма акциї почала пияток пополадню, кед опрез Каритасу дочекани учашнїки едукациї. Истого дня после вечери у Етно клубу „Одняте од забуца” було орґанизоване друженє, а предсидателька Етно клуба Аранка Медєши волонтером указала експонати и приповедала им о историї и култури народох котри жию у Коцуре.
Всоботу после фриштику єдна ґрупа котра змесцена у Каритасу присуствовала едукациї на котрей учели як ше правилно пише проєкти и на цо треба обрациц повагу при конкурованю на векши конкурси котри розписує Европска уния. Едукацию водзели координатор Каритасу Апостолского еґзархату у Коцуре Елемир Джуджар, координаторка Каритасу Апостолского еґзархату у Новим Садзе Анита Ґовля и Соня Гудак зоз орґанизациї за младих Балкан ИДЕА зоз Нового Саду. Други волонтере робели на роботней акциї у Коцуре у котрей офарбели капуру у Руским доме, ограду на старей землєдїлскей задруґи и кулї коло драги у центру валала. По законченю роботней акциї волонтере мали орґанизовани одход до Центру за физичну културу до Вербасу дзе могли хасновац цали комплекс ЦФК-у, а од 22 годзин були и на гуманитарним концерту „Харт рок фест”.
Внєдзелю волонтере котри пришли зоз наших местох могли пойсц на богослуженє до грекокатолїцкей, римокатолїцкей або православней церкви, а после полудзенку акция за нїх закончена.
Волонтере котри пришли прейґ програми „Ерасмус плус” после полудзенку орґанизовано одпутовали до Нового Саду и Петроварадину, дзе мали нагоду обисц знаменїтосци городу.
