ВЕРБАС – Вчера, 24. фебруара, у Центре за физичну културу „Драґо Йовович“ у Вербаше отримани Саям образованя, у орґанизациї вербаскей Служби новосадскей Филияли Националней служби за обезпечованє роботи.
Школяре основних и штреднїх школох достали информациї о образовних установох у жеми, як и напрямки о професийней ориєнтациї и планованю будуцей кариєри.
На Сайме ше представела Национална служба за обезпечованє роботи, ґимназиї и штреднї школи з Нового Саду, Вербасу, Кули, Червинки и Србобрану, як и три факултети, єдна висша школа и вецей приватни штреднї школи и факултети.
Пре уводзенє дуалного образованя до наставней програми, школяром ше представели и вецей привредни субєкти и представителє Привредней комори.
Саям за даскельо годзини нащивели школярe и числени просвитни роботнїки, як и представителє Школскей управи Нови Сад.