ВЕРБАС – Без огляду на високи температури и очековане векше трошенє води, на подручу општини Вербас водоподмирйованє стабилне.
Трошенє води векше за 15 до 20 одсто од звичайного просеку, алє продукция води у вербаским „Водоводу” була стабилна и прешлого лєта, кед були тропски температури, а терашнє трошенє у одношеню на прешлорочне вельо менше.
Як потолковал руководитель Дїловней єдинки „Водовод и канализация” вербаского Явного комуналного подприємства „Комуналєц” Мирослав Фейса, шицки студнї хтори у системи водоподмирйованя у функциї и активни су.
За таки стан, як гвари Фейса, заслужни и вельки дижджи у остатнїх двох мешацох, алє и система далїнского надпатрунку хтору ше континуовано унапредзує.
Вон додал и же, дзекуюци пошореньом за провадзенє трошеня води, дзепоєдним хасновательом суґеровали же маю нєрационалне трошенє и на тот способ зопарли нєконтроловане одлїванє води.
Того лєта Вербас нє ма анї проблем з зменшаньом прициску, понеже прешлого року реконструована часц водоводней мрежи у улїчкох Йожефа Пехана и Сави Ковачевича. 