У Водици на Завитни дзень означена 15-рочнїца Еґзархату

автор маф
1.2k Опатрене

РУСКИ КЕРЕСТУР – У Водици, вчера, на Завитни дзень на Архиєрейскей Служби Божей шветочно означена 15-рочнїца снованя нашого Апостолского еґзархату у присустве нашого еґзарха преосвященого владики Георгия Джуджара и ище седем владикох обидвох обрядох, коло 30 священїкох, монахиньох, представительох политичного, явного и културного живота и вельо вирних з Керестура и наших парохийох и госцох.

– Подзекуйме Господу Богу за шицки благодатї и модлїме Божи благослов и охрану нашей нєбесней Мацери за нашо будуци намаганя, за духовне и материялне добро нас присутних и каждого припаднїка и члена нашей Церкви и врацме ше зоз того места иншаки, голєм дакус лєпши – поручел владика Джуджар

Домашнї владика привитал шицких, а насампредз секретара Конґреґациї за восточни церкви з Риму архиепископа Цирила Василя хтори предводзел Службу Божу, а сослужели апостолски нунций у Сербиї монс. Лучияно Сурияни, преузвишеного монс. Станислав Хочевар, беоґрадски надвладика и митрополит, римокатолїцки владикове  суботицки и сримски монс. Янош Пензеш и монс. Дюра Ґашпарович,  монс. Киро Стоянов, скопски владика и апостолски егзарх,  преосв. владика Нил Лущак з Мукачевскей епархиї у України и наймладши владика Абел Сочко з Нїредьгази у Мадярскей.

Сослужели або споведали и коло трицец священїки латинского обряду и з нашого Еґзархату. Владика привитал преподобни шестри на чолє з провинциялну настоятельку, його екселенцию амбасодора України Олександра Александровича, народну посланїцу Олену Папуґа, представительох явного и културного живота з канцелариї за одношеня з церквами и вирскима заєднїцами Ґаврила Ґрбана, предсидателя општинскей власци Перицу Видеканїча, предсидателя НС Руснацох Славка Раца и членох, представительох културних, просвитних и других установох, и паломнїкох и почитовательох мацери Божей Водицовей з Керестура и других наших местох, и госцох паломнїкох.

Наказовал по русински архиепископ Васил хтори по походзеню Русин зоз Словацкей и висловел свою радосц же є з тей велькей нагоди у Водици дзе ше чувствує як дома медзи своїма и познатима. Владика поволал присутних же би ше трудзели жиц по прикладу Мацери Божей и Исуса Христа и исц за нїм.

На Служби шпивал домашнї Хор катедралней церкви св. оца Миколая и Дому култури з дириґентку Лидию Пашо и домашнї дзияк Янко Виславски, „апостол” читал новосадски дзияк Йовґен Надь, євангелию наймладши о. Данил Задрепко, модератор шветочносци бул декан бачки о. Владислав Рац, парох коцурски, а шицких госцох привитал и домашнї парох о. Михайло Малацко. Службу Божу директно преношел и Радио „Мария”.

Барз добрей орґанизациї преслави вельо допринєсли домашнї Церковни одбор, волонтере Каритасу и велї други парохиянє.

ПОВЯЗАНИ ТЕКСТИ