РУСКИ КЕРЕСТУР – Рускокерестурска парохия вчера, 8. септембра, преславела швето Рождество Богородици – Малу Матку Божу по григориянским календаре, а на тото швето у каплїци Исусових малих шестрох на Циґлашоре преславени и Кирбай.
Кирбайску Службу Божу служел парох о. Михайло Малацко, котри и наказовал. Апостол читал Янко Цап, а попри Исусових малих шестрох и шестрох Служебнїцох, у каплїци на Кирбай було и красне число вирних.
Парох у казанї наглашел Марийов приклад, хтора у цихосци слухала Боже слово и мала отворене шерцо за Бога.
– Тото швето нам указує нови тип побожносци и любови – през слуханє и стретнуце з Господом Богом глїбоко у своєй души ми можеме, як и Мария, духовно народзиц Исуса Христа, котри гварел „Дзе двойо, або тройо у мойо мено, там и я медзи нїма” – гварел о. Малацко.
На Малу Матку Божу Богослуженя були и у Катедралней церкви на 8 и 19 годзин, а Велька Служба Божа у Водици на 10 годзин, хтору служел и наказовал капелан о. Владимир Медєши, а споведал о. Михайло Шанта.