ВЕРБАС – У просторийох КПД „Карпати” всоботу, 8. априла, отримана традицийна роботня з тему Велькей ноци, на хторей участвовали дзеци котри виучую мацерински язик. Роботи и писанки буду виложени у парохийним доме церкви Покрова Пресвятей Богородици у Старим Вербаше.
Учителька руского язика у трох основних школох у Вербаше Славица Мали визначела же пред роботню дзеци мали пририхтуюци годзини у школох, на хторих рисовали и учели писнї о Велькей ноци. У сотруднїцтве зоз старовербаским парохом о. Алексийом Гудаком, Малийова о тей теми орґанизовала и заєднїцку годзину з дзецми котри ходза на виронауку.
Понад трицецеро дзеци рисовали малюнки, фарбели писанки и правели рижни прикраски, а то була нагода и же би своїм парняком и присутним вирецитовали писнї хтори пририхтали за преславу найвекшого християнского швета.