КОЦУР – Вчера, 16. марца, у Велькей сали Месней заєднїци у Коцуре, отримане преподаванє за младих польопривреднїкох котре орґанизаовало Коцурске здруженє младих „КУМ” у сотруднїцтве зоз Здруженьом новинарох за польопривреду „Аґропрес”.
На преподаваню бешедовали предсидатель Општини Вербас Милан Ґлушац, котри присутним бешедовал о польопривредних капацитетох општини Вербас, o значносци беґелю Дунай-Тиса-Дунай и Єґрички, як и помоци Општини младим польопривреднїком при одплацованю польопривредних кредитох.
Окрем предсидателя Општини Вербас, на преподаваню присуствовал и совитнїк министра польопривреди, дипл. инж. польопривреди Радивой Надлачки, котри младих парастох поинформовал о мирох аґрарних реформох, аґрарней политики Републики Сербиї и о ИПАРД националних фондох за польопривреду.
Представителє „Дунай” осиґураня презентовали свою програму защити шацох и потолковали прецо важне осиґурац польопривредни култури.
Преподаванє знїмала екипа емисиї „Знанє иманє”, а др Лука Радоя присутним бешедовал о статкарстве.