КОЦУР – У Коцуре на виберанкох за предсидателя Сербиї вчера гласали 1 986 гласаче, односно 57 одсто зоз 3 478 уписаних до виберацкого списку, а найвецей – 1 182 гласи, односно 59,5 одсто освоєл Александар Вучич, кандидат владаюцей коалициї на чолє зоз Сербску напредну странку.
На другим месце по числу освоєних гласох у Коцуре Лука Максимович спред ҐГ „Любиша Прелетачевич Били-Лєм моцно”, котри достал 166 гласи, лєбо 8,4 одсто гласох гласачох котри вчера гласали.
На трецим месце Саша Янкович спред ҐГ „За Сербию без страху”, котри освоєл 150, односно 7,5 одсто гласох, а на штвартим Ненад Чанак спред Лиґи социялдемократох Войводини, котри освоєл 142 гласи, лєбо 7,1 одсто.
Воїслав Шешель достал 95 гласи, лєбо 4,7 одсто; Вук Єремич 83, цо 4,1 одсто; Саша Радулович 39 гласи – 1,9 одсто; Бошко Обрадович 23 гласи – 1,1 одсто; Милан Стаматович 11 гласи, лєбо 0,5 одсто, Мирослав Парович достал 9 гласи, а Александар Попович у Коцуре достал 6 гласи.
Коцурци гласали на штирох виберацких местох – на двох у Месней заєднїци и двох у ОШ „Братство єдинство”.
