НОВИ САД – У Покраїнским секретарияту за културу, явне информованє и одношеня з вирскима заєднїцами вовторок, 24. юлия, представнїки руских институцийох чийо ше активnосци з часци финансує з покраїнского буджету, бешедовали зоз покраїнску секретарку Драґану Милошевич о потримовки у ришованю просторийох Заводу за културу войводянских Руснацох и НВУ „Руске слово”, и о РНТ „Петро Ризнич Дядя”.
На схадзки були – предсидатель Националного совиту Руснацох Славко Рац, предсидатель Вивершного одбору Националного совиту Желько Ковач, директорка НВУ „Руске слово” Мартица Тамаш, директорка Заводу за културу войводянских Руснацох Анамария Ранкович, предсидатель Управного одбору Заводу Миломир Шайтош и директор РНТ „Петро Ризнич Дядя” Славко Орос.
Була то перша схадзка од менованя Драґани Милошевич на тоту функцию, та представнїки руских институцийох поинформовали покраїнску секретарку о ситуациї коло просторийох до хторих би ше требал преселїц Завод за културу войводянских Руснацох, а же би ше вец НВУ „Руске слово” могла преселїц на адресу дзе тераз Завод. За адаптацию будуцого Заводового простору, зоз чим би ше длугорочно ришел проблем просторийох тих институцийох, потребни одредзени финансийни средства. Познате же НВУ „Руске слово” у будинку „Дневнику”, а Завод у просторийох „Руского” у Футожскей улїци, а актуална тема и предаванє будинку „Дневнику” у Новим Садзе.
У розгварки виложени и нєвигодни статус Руского народного театру и було слова о вецей можлївосцох за його ришованє, а Драґана Милошевич указала заинтересованосц за ришованє тей ситуациї.
На схадзки бул присутни и Станислав Радулович подсекретар Покраїнского секретарияту за културу, явне информованє и одношеня з вирскима заєднїцами.
