БЕОҐРАД/НОВИ САД -По нових податкох Тиму за социялне уключованє и зменшанє худобства Влади Сербиї, гранїца худобства у прешлим року була 11 694 динари мешачно по трошительней єдинки, а 7,3 одсто гражданох були спод тей гранїци. Гранїцу абсолутного худобства ше утвердзує кажди рок.
Прешлого року у Войводини було 110 746 худобних, цо 6,3 одсто од милион 747 144 жительох Покраїни. Пред тим, 2007. року було 11,9 одсто худобних, а тото число зменшане 2008. року на 6,8 одсто. Значне зменшанє було и 2012. року на 6,1 одсто, 2013. року на 5,2 одсто, а нагло є звекшане 2014. року на 6,8 одсто, та на 6,5 одсто 2015. року.
З нових ревидированих податкох дознаваме же коло пол милиона жительох Сербиї нє у можлївосци задоволїц минимални еґзистенциялни потреби. Дзеци дупло загроженши з худобством як одроснути, а частейше є звонка варошох. Прешлого року у городских населєньох худобних було 5,1 одсто, а звонка городох аж 10,5 одсто, окреме у реґионох южней и восточней Сербиї.
Аж 60 одсто худобних жию у обисцу дзе ношитель ґаздовства ма закончене основне образованє, або го анї нє ма. У катеґориї нєзанятих процент худобних 22,5, при нєактивних 20,4, а при занятих 2,8 одсто.
Анализи указую же ше худобство зменшує за остатнї дзешец роки, цо позитивни тренд, заключує Тим.
За децению, од 2006. до 2016. року, стопа худобства зменшана зоз 8,8 на 7,3одсто. Число худобних 2016. року було 705 976 з вєдно 7 милиони 985 174жительох.
Прешлого року число худобних було 492 306 жительох зоз 6 милиони 755 343 жительох Сербиї, а стопа худобства 7,3 одсто. З того мож заключиц же жительство Сербиї за децению зменшане за 229 831, а худобство за 1,5 одсто.