ДЮРДЬОВ – У церкви Рождества Пресвятей Богородици у Дюрдьове вчера виняти и винєшени шицки цегелки хтори стали на жеми, дзе перше будзе поставене жемово зогриванє на струю, а потим мраморово цегелки.
Пред даскельо роками мрамор поставени у олтаре и у єдней часци опрез нього, а з тоту акцию ше планує закончиц його поставянє у цалей церкви.
Пририхтованє за кладзенє новей жемовей подлоги почало початком того тижня з роботну акцию членох Церковного одбору и парохиянох, вєдно з о. Михаилом Холошняйом, та перше винєшени столки з церкви, олтар закрити зоз защитну фолию, ушорена и порта, же би потим почали роботи у нукашньосци церкви.
Кладзенє зогриваня и цегелкох финансийно потримали владичества з Келну, з Нємецкей и зоз Хуру у Швайцарскей, як и Управи за сотруднїцтво з церквами и вирскима заєднїцами при Министерстве правди Влади Сербиї. За єдну часц того велького укладаня рахує ше и на помоц парохиянох, зоз збераньом добредзечних прилогох.
Роботи би мали буц закончени концом юлия, лєбо початком авґуста, а потамаль шицки богослуженя буду у парохийним доме коло церкви.