НОВИ САД – Трицец шесте тогорочне число новинох „Руске слово” у рубрики „Тижньовнїк” дава звит зоз схадзки Координациї националних совитох националних меншинох хтора була пошвецена образованю, а обрабя и приватизацию меншинских медийох на прикладох з Европскей униї.
Рубрика „Нашо места” анализує яки безпечносни условия у Руским Керестуре два роки по поставяню безпечносних камерох, ту и звит зоз схадзки Скупштини општини Кула, а „Економия” пише о новооснованей Землєдїлскей задруґи „Керестурска паприґа”.
На „Култури и просвити” мож пречитац яка атмосфера була на Фестивалє тамбурових оркестрох „Мелодиї Руского двору” у Шидзе, зазначени и початок нового школского рока у основних школох у Керестуре и Коцуре, а ту и звит зоз схадзки Активу вихователькох руского язика. У тей рубрики и розгварка з Миколом Шантом о условийох роботи у КУД „Жатва” у Коцуре после шейсцмешачней активносци нового руководительства.
„Мозаїк” зазначел подїю за младих у Дюрдьове „Укаж цо (нє) знаш” и розгварку з братами Иваном и Петером Рацовима з Нємецкей, котри успишни у тайландским боксу.
На бокох рубрики „Людзе, роки, живот” нове предлуженє фельтону „Як (нє) скапал рокенрол”, представена и фамелия Цапових з Вербасу, док рубрика „Духовни живот” представя даскельо нови кнїжки о. Романа Миза.
На бокох „Спорту” резултати наших фодбалских и других клубох на початку першенственей сезони, ту и розгварка з Ференцом Бураньом, а у тим чишлє додаток „Руске слово у швеце”.