РУСКИ КЕРЕСТУР – Вчера, 22. марца, на Драмским мемориялє Петра Ризнича Дядї представу „Чаривни персцень”, по тексту Катарини Перелисней, а у режиї Петра Курмана, по українски виведли дзеци з КУД „Иван Сенюк” з Кули.
Понеже представа була по українски, у мено госцох Филип Пронек публики по сербски пречитал єй кратши змист, а повагу дзецох тримала и прекрасна богата сценоґрафия лєса, хтору обдумал режисер Курман, тиж и костими Зорици Йовович, одлични вибор музики Василя Дацишина и балетни точки Танї Литвинчук.
Млада керестурска публика похопела змист и поруку тей сказковитей представи – же добре на концу вше победзує над злом, а бешедує о тим як принцеза страцела чаривни персцень док ше купала у рики, а вец ше и сама страцела у лєше. Зли русалки ю зачаровану скрили до хижки, алє ю з помоцу животиньох пренашол и виратовал млади принц.
У представи участвую аж двацецеро дзеци – петнацецеро ґлумци и пецеро члени младшого танєчного ансамблу „Ивана Сенюка”.
(Вецей фотоґрафиї з представи у фото-ґалериї на правим боку сайту).