У тим року и участвованє на Штернастим ШК РРЛ

автор сен
1.2k Опатрене

КУЛА – Всоботу, 25. фебруара, у Кули отримана Рочна скупштина Рускей матки (РМ), на хторей представени звити о роботи за 2016. рок, як и плани роботи у 2017. року того здруженя, як и його месних, Городского и Реґионалного одбору – у Руским Керестуре, Кули, Коцуре, Вербаше, Новим Садзе и Шидзе.

Предсидатель РМ Дюра Папуґа гварел же 2016. рок бул характеристични по предлужованю активносцох на очуваню руского/руснацкого духу и змоцньованю того идентитету, а як єдну з найзначнєйших активносцох РМ визначел сотруднїцтво з Бунєвску матку, Матку словацку и Матицу сербску и початок ришованя статусу славянских маткох у Войводини и Сербиї.

Значни проєкт РМ влонї було пририхтованє першого Медзинародного русинского филмского фестивалу „Русин филм фест”, хтори отримани 1. и 2. октобра у Шидзе, а тиж єдна з найзначнєйших цалорочних активносцох то и пририхтованє штирох числох глашнїку РМ „Руснак”. Матка и єй одбори прешлого року були орґанизаторе и соорґанизаторе рижних културних збуваньох и програмох, як цо то Руски фестивал малих сценских формох „Дюра Папгаргаї” у Новим Садзе, Стретнуца поетох у Руским Керестуре, рижни вистави, дзецински представи и роботнї.

Предсидатель РМ винєсол и финансийни звит, по хторим приходи по проєктох у 2016. року були 718 250 динари, а розходи на концу рока 726 980 динари.

Окремна увага Рускей матки у тим року будзе на пририхтованю и участвованю єй делеґациї на 14. Шветовим конґресу Русинох/Руснацох/Лемкох (ШК РРЛ) и 8. Шветовим форуме русинскей младежи, хтори од 29. юния по 2. юлий буду отримани у Осиєку, у Горватскей.

У тим року Матка будзе конкуровац з пейцома проєктами до ресорних покраїнских секретариятох, Министерства култури и информованя и Општини Кула, медзи нїма и за видаванє штирох числох глашнїку „Руснак”, орґанизованє „Русин филм фесту” у Шидзе, одход на ШК РРЛ, орґанизованє Подобовей колониї „Коцур 2017”, Стретнуца поетох, литературних и подобових творительох РМ, за порядну дїялносц, а як поведзене, векша увага будзе дата и орґанизованю Руского фестивалу малих сценских формох у Новим Садзе.

ПОВЯЗАНИ ТЕКСТИ